क्रमाॅंक:- 526, सोनाखान, जिला-बलौदा बाजार (छत्तीसगढ़) से कवि परमानंद निषाद"प्रिय" की विशेष गीत- माँ दुर्गा भजन

मईया बिराजे हावय मोर निठोरा गाँव म।

बैठे हावय भईया नीमवा के छाँव म।

मोर गाँव के दुर्गा दाई तोला सुमरौ ओ।।--2

मोर निठोरा गाँव हे नदिया के तीर म।

जोंक नदी म नाँव बहे सुघ्घर नीर म।।

मईया बसे हे नीमवा के पेड़ म।

मईया भक्त संग चले हर मोड़ म।

मोर गाँव के दुर्गा दाई तोला सुमरौ ओ।।--2

निठोरा के तरिया म बने भोला के मंदिर।

गाँव के हर नर-नारी पूजा करँय रात-दिन।।

आये हे परमानंद बजरंगी के शरण म।

मोर गाँव के दुर्गा दाई तोला सुमरौ ओ।।--2

चंद्रहासिनी बैठे हावय संग म नाथलदाई।

श्रीराम भक्त हनुमान ह सबके करँय सहाई।।

बूढ़ादेव बिराजे हे मोर निठोरा गाँव म।

बैठे हावय मईया नीमवा के छाँव म।

मोर गाँव के दुर्गा दाई तोला सुमरौ ओ।।--2

            परमानंद निषाद'प्रिय'

       ग्राम - निठोरा,पोस्ट - थरगाॅंव,

तह.-सोनाखान,जिला-बलौदा बाजार(छ.ग.)

मो.- 7974389033

ईमेल- sachinnishad343@gmail.com